ಸುದ್ದಿಯಲ್ಲಿ ಏಕಿದೆ? ಫ್ರಾನ್ಸನ ಡಸಾಲ್ಟ್ ಏವಿಯೇಷನ್ ಮತ್ತು ಟಾಟಾ ಅಡ್ವಾನ್ಸ್ಡ್ ಸಿಸ್ಟಮ್ಸ್ ಲಿಮಿಟೆಡ್ ರಫೇಲ್ ಯುದ್ಧ ವಿಮಾನದ ಫ್ಯೂಸ್‌ಲೇಜ್‌(ಬಾಡಿ ಚೌಕಟ್ಟು)ಗಳನ್ನು ಭಾರತದಲ್ಲಿ ಉತ್ಪಾದಿಸಲು ನಾಲ್ಕು ಉತ್ಪಾದನಾ ವರ್ಗಾವಣೆ ಒಪ್ಪಂದಗಳಿಗೆ ಸಹಿ ಹಾಕಿವೆ.

ಮುಖ್ಯಾಂಶಗಳು

• ಫ್ರೆಂಚ್ ವಿಮಾನ ತಯಾರಕ ಡಸಾಲ್ಟ್ ಏವಿಯೇಷನ್, ಟಾಟಾ ಗ್ರೂಪ್‌ನೊಂದಿಗೆ ಒಪ್ಪಂದ ಮಾಡಿಕೊಂಡಿದ್ದು, ರಫೇಲ್ ಯುದ್ಧ ವಿಮಾನಗಳ ಫ್ಯೂಸ್‌ಲೇಜ್‌ಗಳನ್ನು ಭಾರತದಲ್ಲಿ ಉತ್ಪಾದಿಸಲು ಟಾಟಾ ಅಡ್ವಾನ್ಸ್ಡ್ ಸಿಸ್ಟಮ್ಸ್ ಲಿಮಿಟೆಡ್ (ಟಿಎಎಸ್‌ಎಲ್‌) ಜೊತೆ ಒಪ್ಪಂದ ಮಾಡಿಕೊಂಡಿದೆ.

§  ಇದಕ್ಕಾಗಿ ಹೈದರಾಬಾದ್‌ನಲ್ಲಿ ಉತ್ಪಾದನಾ ಘಟಕ ಸ್ಥಾಪನೆಯಾಗಲಿದ್ದು, 2028ರಲ್ಲಿ ಮೊದಲ ಭಾಗಗಳು ಹೊರಬರುವ ನಿರೀಕ್ಷೆಯಿದೆ.

• ಈ ಸಹಭಾಗಿತ್ವವು ಭಾರತದ ಏರೋಸ್ಪೇಸ್ ಉತ್ಪಾದನಾ ಸಾಮರ್ಥ್ಯವನ್ನು ಬಲಪಡಿಸುವ ಮತ್ತು ಜಾಗತಿಕ ಪೂರೈಕೆ ಸರಪಳಿಗಳನ್ನು ಬೆಂಬಲಿಸುವ ನಿಟ್ಟಿನಲ್ಲಿ ಮಹತ್ವದ ಹೆಜ್ಜೆಯಾಗಿದೆ.
• ವಿಮಾನದ ಮುಂಭಾಗ, ಮದ್ಯದ ಭಾಗ, ಹಿಂಭಾಗ, ಫ್ಯೂಸ್‌ಲೇಜ್‌ಗೆ ತಾಕಿಕೊಂಡಿರುವ ಶೆಲ್‌ಗಳನ್ನು ಇಲ್ಲಿ ಉತ್ಪಾದಿಸಲಾಗುತ್ತದೆ
• ಡಸಾಲ್ಟ್‌ ಫ್ರಾನ್ಸ್‌ನ ಹೊರಗೆ ಮೊದಲ ಬಾರಿಗೆ ವಿಮಾನದ ಬಾಡಿಗಳನ್ನು ಉತ್ಪಾದನೆ ಮಾಡುತ್ತಿದೆ. ಇದು ಪೂರೈಕೆ ಸರಪಳಿಯನ್ನು ಬಲಪಡಿಸಲಿದೆ.

ಫ್ಯೂಸ್‌ಲೇಜ್‌

ಪೈಲಟ್, ಪ್ರಯಾಣಿಕರು ಮತ್ತು ಸರಕುಗಳನ್ನು ಹೊತ್ತೊಯ್ಯುವ ಮಹತ್ವದ ಭಾಗವನ್ನು ಫ್ಯೂಸ್ ಲೇಜ್ ಎಂದು ಕರೆಯಲಾಗುತ್ತದೆ.

ರಫೇಲ್

• ರಫೇಲ್ ಫ್ರೆಂಚ್ ಅವಳಿ-ಎಂಜಿನ್, ಬಹುಪಾತ್ರದ ಯುದ್ಧ ವಿಮಾನವಾಗಿದ್ದು, ಇದನ್ನು 4.5 ತಲೆಮಾರಿನ ವಿಮಾನವೆಂದು ಪರಿಗಣಿಸಲಾಗಿದೆ, ಇದು ವಾಯು ರಕ್ಷಣೆ, ವಾಯು ಬೆಂಬಲ, ಆಳವಾದ ದಾಳಿಗಳು ಮತ್ತು ಪರಮಾಣು ತಡೆಗಟ್ಟುವಿಕೆ ಸೇರಿದಂತೆ ಆಕಾಶದಿಂದ ಆಕಾಶಕ್ಕೆ , ಆಕಾಶದಿಂದ ಭೂಮಿಗೆ ಹಾರುವ ಸಾಮರ್ಥ್ಯವನ್ನು ಹೊಂದಿದೆ.
• ಭಾರತೀಯ ವಾಯುಪಡೆಯು ಈಗಾಗಲೇ 36 ರಫೇಲ್ ವಿಮಾನಗಳನ್ನು ನಿರ್ವಹಿಸುತ್ತಿದೆ. ಈ ವರ್ಷದ ಏಪ್ರಿಲ್‌ನಲ್ಲಿ ಭಾರತ ಮತ್ತು ಫ್ರಾನ್ಸ್ ನಡುವಿನ 63,000 ಕೋಟಿ ರೂ. ಮೌಲ್ಯದ ಒಪ್ಪಂದದ ಭಾಗವಾಗಿ ಭಾರತೀಯ ನೌಕಾಪಡೆಯು 2030 ರ ವೇಳೆಗೆ 26 ರಫೇಲ್ ಮೆರೈನ್ ಜೆಟ್‌ಗಳನ್ನು ಸೇರ್ಪಡೆಗೊಳಿಸಲಿದೆ
• ಭಾರತೀಯ ವಾಯುಪಡೆಯ ಏರ್ ವೈಸ್ ಚೀಫ್ ಮಾರ್ಷಲ್ ಹಿಲಾಲ್ ಅಹ್ಮದ್ ರಫೇಲ್ ಯುದ್ಧ ವಿಮಾನ ಹಾರಿಸಿದ ಮೊದಲ ಭಾರತೀಯ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿದ್ದಾರೆ.